Nemo 的後花園

今日繼續講吓香港星期日個立法會選舉，未選經己爭議連連，呢個狗餅鍾庭耀認真 狗唔搭貓 佢話打算喺投票當日晨咁早就分幾個時段公布票站調查統計數字，結果招惹是非，各方便都大肆評擊，話佢咁做就會擾亂各候選人嘅部署，到底鍾庭耀為左乜今次要咁出位呢？係咪要搏多啲 注意力 呢，係咪不甘寂寞呢？原本佢喺學術界都有啲名聲，其實唔使靠呢招出位，抑或佢受人指使呢？即係話資助佢呢次票站調查嘅機構係幕後黑手呢？（當然冇人認，兼夾當事人都要暗啞坻，唔通話俾人知係老細想咁做咩？）

呢個龜公耀俾人鬧左一日之後即刻 縮陽 ，話唔再晨咁早分時段公佈數字喎，係丫嘛，做埋啲冇意義，又擾亂人思緒嘅嘢，就係貪你夠權威性先請你做調查，係俾事後分析丫嘛，唔係叫你去嚇人丫嘛， 但係又會有幾多人會講真話呢？咁多年投票我都唔對啲調查員講嘢，我相信好多人都一樣，咁所謂調查嘅可信性又有幾高呢？

不過今次選戰都算激烈，所謂建制派同泛民派又爭，泛民派內部又互相撕殺，互相踐踏，真係慘不忍睹咯！