Nemo 的後花園

回應一位網友嘅留言，我諗香港係重係一個言論自由嘅地方甚至比英政府統治時期更開放，你可以鬧到特首狗血淋頭都冇事，重有人打落水狗實行圍政佢，老董就係咁俾人轟左落台，以前係你邊可以批評政府！知唔知以前左派報紙經常被搜查，工聯會開文藝大會都有政治部差人監場（點可以唔俾，容乜易俾佢告非法集會），而家直頭大踩中央政府都得，唔知邊個自由啲呢？

而家香港嘅所謂民主政制係英政府臨撤出香港時埋低嘅計時炸彈，如果英政府唔使撤出香港，你估有有而家咁民主呢？彭定康政府就係想留低一啲干擾俾未來特區政府而推出代議政制，留低一啲勢力喺香港繼續影響香港，言論自由？知唔知香港電台新聞稿係政府新聞處發？有個新聞官坐鎮港台？係囉喎，俾你而家有個所謂 '民間電台' 無牌廣播，重要慢慢告你先至入罪，以前揸個大聲公叫街都即時拉人，唔使講嘢，以上所講全部事實，絕唔係吹水！關於話鐵票問題，請問入到票站裡面投票，有邊個知你投左去邊，至於話有人'勸'你投邊個邊個，因為你受過人著數，又或者叫做半恐嚇，更加係誣蔑，喂！我拉票啫，你受咪投囉，至於我，你有咩証明我冇投你票先？你唔夠票點知亞邊個有冇投你票喎！

所以泛民派應該撿討一下點解啲游離票同埋啲两便都唔投嘅票爭取唔到返嚟，我唔係絕對咁支持 '建制派' ，不過十分討厭某啲所謂 泛民派 嘅嘴臉，一幅大義凜然咁唯我獨尊，只有佢地至可以救香港，香港而家水深火熱咩，要着數就問 阿爺 攞，攞完之後又話阿爺多聲氣，呢班人到底乜嘢心態呢？

到底乜嘢叫做民主呢？民主有冇註册專利呢？佢哋有理冇理反政府就叫民主，人哋有唔同意見就叫保皇，投佢哋票唔夠多就賴話人哋有鐵票，從唔撿討自己嘅失誤，咁唔尊重人哋嘅選擇，咁就叫民主！

MTV 台灣的總桶      主唱：阿扁

http://www.goodcity.com.tw/bobo/11/

立法會俾幾個惡人入左去，到立法會復會時就精彩咯！有時對佢哋真係又愛又恨，恨佢吔經常引起一啲無謂嘅爭抝，成日嘈嘈閉冇益冇建設性，明知特區政府無能為力去改變嘅政制改革，但係為左爭取眾人目光，爭取曝光指數，經常喺議會上爭抝，可以叫做嘩眾取寵。但係另方便又好喜歡佢哋對政府施政嘅缺失窮追猛打，絕唔俾庸官蒙混過關，唔係得建制派所謂顧全大局，會輕輕放過曾蔭權政府，香港實左需要一班切切實實去監察政府運作嘅人，佢哋又確實做到呢點。

所以話佢哋入到局都好，雖然未能夠癱瘓政府，令政府成為跛腳鴨，但係都可以造成大量噪音，令市民關注。希望佢哋喺呢四年裡面多做實質上嘅嘢，唔好搞其他小動作，咁就係小市民嘅福祉！

大鑼大鼓，投票日又嚟到喇，我都會去投票㗎，我去投票唔係想投俾我想佢當選嘅人，而係投俾我最唔想佢當選嘅人之主要競爭對手，希望佢嘅對手贏多佢一票得一票，喺比例代表制嘅選舉形式下，雖然係名單第一位夠票出，但係餘下第二個位就要好努力咁爭取！

以我港島區為例，第二位出線嘅選情十分激烈，要全取兩票真係要睇啲游離票出唔出嚟投同埋投俾邊個。以我為例，我雖然未必咁強烈支持阿某某張名單，但係我非常厭惡係哋個對頭人，討厭佢哋行事作風，口講民主，自已黨內都冇民主，自已黨內都四分五裂，黨裡面啲人亦都醜聞多多，而家只係剩返個爛招牌充撐場面。嗰個通番賣國，自跨係香港民主教父嘅表面上退左落嚟，但係重喺後面指手劃腳，垂簾聽政，你話呢個黨重有乜前途？難怪其他人唔放佢哋在眼內，人人都想去搶佢票啦！如果其他人唔分薄佢哋嘅票，佢哋使乜咁早就大叫告急丫，佢哋肯定頭兩件齊出啦！

我好毒㗎，我望佢哋死，望佢哋個陣營互片，死傷枕藉，自已削弱自已力量，眼白白咁失去議席，自食惡果，點解唔撿討一下策略，無謂爭抝實在太多，明知不可為重強行爭抝，為的唔係成事，只係為左爭取話題，爭取爆光，實在令人厭倦！

或者你唔同意我所講，社會係需要反對聲音，但係反對聲音唔等於燥音，冇益冇建設性嘅嘢我哋唔需要，俾個教訓佢哋，食老本會坐食山崩，佢哋應該調整一下佢哋嘅路線，爭取一啲例如我，唔喜歡激進路線嘅人喎！

無論你支持乜嘢理念，即刻唔好再坐喺電腦面前，馬上去投票，表態支持你想香港變成點，或者唔想香港變成點！