Nemo 的後花園

來去怱怱嘅颱風，話咁快就嚟，話咁快就走，不過大雨仍然持續，天氣仍然好差。

呢幾日病到我死死下，發完高燒隻腳又話淋巴腺發炎，紅紅腫腫，食消炎葯當然情況改善，但係啲消炎葯又令到我個胃痛到死咁，幾日都食唔到嘢，乜嘢心情都冇哂，本來自己買左胃葯食都好似冇乜效，呢隻嘢真唔掂，結果都係買番  胃仙Ｕ  食先得，噚晚食左兩次，今朝起身再唔覺得痛，只係覺得重有少少頂住，又可能消炎葯療程完左，唔使再食，加埋啲新胃葯掂啦。

淋巴脚發炎好得七七八八，重要搽消炎药膏，都唔知行左乜嘢衰運，搞左我四、五日咁唔自在，今個星期夜班正職本來放年假，點知就病我幾日，真真冇癮！呢幾晚九點半就返上床休息，鬼有心情睇電視、玩電腦咩，瞓就瞓到足哂，不過就好似嘥左個假期，今日我狀態回係八成到啦，希望胃口返番嚟，唔想食嘢但係肚又餓，真慘，病左幾日即時瘦左好多，居然成日跌褲，要抽番起佢，真係麻煩，解決方法係唯有係小食多餐，食番起縮細左個胃啦！

都唔係冇好處，呢幾日食少好多煙，要戒就好難，希望食少啲囉。

病左兩日，今日叫做精神番啲，暫時都叫頂得住。冇返兩晚工，今晚點都要返，唔使做咩！

我未試過咁高燒，103 度，天旋地轉，星期五朝早臨放工幾乎暈咁伏在張檯度，一收工即刻去見醫生，好彩又唔駛等好耐，噢！講漏左我唔單止發燒，隻左腳扯住扯住咁痛，醫生話係 淋巴腺 發炎，有少少紅同埋少少腫，到底係咪發炎導至我發燒呢？我都唔清楚！

打電話返公司請假，醫生俾兩日病假我喎，星期五我係輪休，原本唔使返，只係休星期六，但係我公司啲怪規距，連續兩日病假，第二日冇錢！吓？我未試過唔知喎，office 個同事提醒我！哎呀，差啲領嘢添，不過唔緊要，星期六朝早要返醫生度覆診，咪叫醫生改假紙淨寫星期六一日就算。

今日星期日，燒就退哂，但係隻腳依然有紅腫重有少少痛，不過今晚工就一定要返，冇計，打工仔要係咁啦！

一係唔病一病就大大劑，睇完醫生度過有103度，自己都嚇一跳，醫生俾左兩日假，我成個人散哂，剛剛食完粥，跟住食藥然後進入昏迷狀態！

呢兩晚都好多嘢做，好似乜嘢都堆埋一齊嚟，真係氣都咳埋。今晚重離譜，差唔多二百人入嚟做嘢，有貨離場又有好多好多物料進場，淨係塞電梯都塞死人，嘩！使唔使一晚安排咁多工程呀？唔使你做咩！我大佬就好啦，安排左自己放大假，唔通一個月前就收到風？有預謀咁閃身而去，知唔知下面班馬騮好難搞架？咁多工程分分鐘會出事，得幾個人手點睇得咁多丫！班大帝乖就好啫，如果唔乖都幾頭痕。

噚日朝早五點幾發現一單工程小意外，如果唔係早發現就孭大鑊，雖然並唔係人為，但係如果早前剛剛有同事巡過都係冇事，行轉背就嚟料，咁就話我哋巡都冇人巡！（好彩 CCTV 拍到全部過程，又好彩唔係死位。）最好彩就係出事冇耐又有另一個同事巡邏，馬上報告我哋知，點解話好彩？因為平時佢哋邊有巡得咁密，如果耐耐都冇人睇下，而又係人為做成嘅，咁呢個 pan 就 very ,very BIG 咯了！點 BIG 法？一個小木櫃跣落地下，撞去一個架，個架嘅玻璃粉碎，個架變左型，架上便啲貨散哂落地，啲貨係貴嘢，一句講哂了：今餐真係多得 耶穌 射住咯！

今日唔係好得閒，本來好想同 阮兄 交流一下，可能要到今晚或者到聽日嘅 “清晨” 當班時有空閒嘅話再寫，我都好開心有朋友提出不同嘅觀點呀！

回應一位網友嘅留言，我諗香港係重係一個言論自由嘅地方甚至比英政府統治時期更開放，你可以鬧到特首狗血淋頭都冇事，重有人打落水狗實行圍政佢，老董就係咁俾人轟左落台，以前係你邊可以批評政府！知唔知以前左派報紙經常被搜查，工聯會開文藝大會都有政治部差人監場（點可以唔俾，容乜易俾佢告非法集會），而家直頭大踩中央政府都得，唔知邊個自由啲呢？

而家香港嘅所謂民主政制係英政府臨撤出香港時埋低嘅計時炸彈，如果英政府唔使撤出香港，你估有有而家咁民主呢？彭定康政府就係想留低一啲干擾俾未來特區政府而推出代議政制，留低一啲勢力喺香港繼續影響香港，言論自由？知唔知香港電台新聞稿係政府新聞處發？有個新聞官坐鎮港台？係囉喎，俾你而家有個所謂 '民間電台' 無牌廣播，重要慢慢告你先至入罪，以前揸個大聲公叫街都即時拉人，唔使講嘢，以上所講全部事實，絕唔係吹水！關於話鐵票問題，請問入到票站裡面投票，有邊個知你投左去邊，至於話有人'勸'你投邊個邊個，因為你受過人著數，又或者叫做半恐嚇，更加係誣蔑，喂！我拉票啫，你受咪投囉，至於我，你有咩証明我冇投你票先？你唔夠票點知亞邊個有冇投你票喎！

所以泛民派應該撿討一下點解啲游離票同埋啲两便都唔投嘅票爭取唔到返嚟，我唔係絕對咁支持 '建制派' ，不過十分討厭某啲所謂 泛民派 嘅嘴臉，一幅大義凜然咁唯我獨尊，只有佢地至可以救香港，香港而家水深火熱咩，要着數就問 阿爺 攞，攞完之後又話阿爺多聲氣，呢班人到底乜嘢心態呢？

到底乜嘢叫做民主呢？民主有冇註册專利呢？佢哋有理冇理反政府就叫民主，人哋有唔同意見就叫保皇，投佢哋票唔夠多就賴話人哋有鐵票，從唔撿討自己嘅失誤，咁唔尊重人哋嘅選擇，咁就叫民主！

MTV 台灣的總桶      主唱：阿扁

http://www.goodcity.com.tw/bobo/11/